探射燈：自恃「叻仔」搵快錢 易入歧途
在文憑試取得佳績的「叻仔」，以售賣答卷副本來賺快錢，有學者指，現今社會笑貧不笑娼，「搵到錢先係叻仔」的核心價值，令學生耳濡目染。心理學家警告，這些「叻仔」一旦嘗到甜頭，便會不惜冒更大風險，最後誤入歧途。
社會風氣影響價值觀
恒生管理學院商學院院長蘇偉文稱，現今社會炒賣風氣盛行，「快錢」搵得多成為新一代成功指標，「個個走去炒iPhone、炒閃卡、炒波鞋，啲學生梗係有樣學樣！」他指成人熱愛投機炒賣，教訓年輕人時便欠說服力，「大人有錢炒樓，細路冇錢咪炒試卷！」
「呢啲學生自以為好叻，專門鑽法律灰色地帶，將來會更大膽冒險，衰咗就更加大鑊！」臨床心理學家葉妙妍解釋，有學識而心術不正者，通常會從事「白領犯罪」，如賄賂、侵犯版權等，自以為較難被人發現，往往要到墮入法網，才後悔莫及。