政情：洪為民驚嘆「愛人」創業勁
互聯網專業協會會長洪為民（Witman）早前以中國代表身份，飛去愛沙尼亞出席聯合國世界訊息高峰論壇大獎，擔任評審。初次遊「愛國」，發現當地IT奇材多，唔少IT人「食腦」創業，令小小「愛國」成為全世界人均創業人數最高嘅地方。
IT風氣盛 青年「食腦」
要逐一評審四百多件參賽作品，Witman自爆過程辛苦過考試，來自世界各地的評審，你一言我一語，晚晚傾到十一點仍未退席，認真勤力。愛沙尼亞人口唔算多，卻極之重視IT文化，Wifi（免費無線上網）被列為人權一部分。Witman發現，去到餐廳同酒吧，餐巾上都印有Wifi密碼，唔使左問右問。不過佢話最正係當地政府善用科技提升市民生活質素，例如市民嘅車牌到期，當局就會發個電郵提示車主，車主只要喺網上按幾個掣辦理就搞掂，快過香港好多。因為IT風氣盛，年輕人習慣咗「食腦」，仲識利用IT開公司賺大錢，唔到你唔服嘞。
