老牌財經報章《信報》尋日嘅頭版出現嚴重錯誤，頭版頭條標題大大隻字為「量寬鷹派棄掌儲局 毆美股揚」，誤將毆打個「毆」字當做歐洲個「歐」，其實想寫嘅係「歐美股揚」。霎下眼，分分鐘會以為信報講緊「毆打美國」。
印咗出去嘅報紙就好似潑出去嘅水，今次《信報》馮京作馬涼，惟有靜雞雞改返網上版本，而且仲要無話畀人知頭版標題有出錯，似乎想當無事發生過。
雖然呢件事網上無乜回響，但傳媒界就瘋傳《信報》頭版錯字消息，有人話《信報》淪落到咁，亦有人懷疑係咪專登出錯。
其實令人有咁嘅聯想，一啲都唔出奇，近日英美有咁多大動作，北京以至特首都有反擊，咁啱《信報》近期換咗新總編輯，所以外界先有人聯想《信報》打擦邊球，以為話中有話，題內有題嘅方式幫中方出一口氣。其實錯咗就係錯咗，點講都講唔甩o架嘞。