香港大學民意研究計劃尋日公布咗新一份有關行政會議成員民望嘅調查報告，十四名行會非官守成員入面，為人最熟悉嘅五大成員除有以往都經常上榜嘅行會召集人林煥光、成員羅范椒芬、李慧琼（Starry）及葉劉淑儀外，竟然今次有鄭耀棠份。呢位從未曾上過榜嘅人兄，今次上榜就排前五名嘅包尾。點解咁出名，實係同佢帶埋老婆大模廝樣坐國泰機豪遊法國，搞到出晒名有關啦。
九名於上個月被爆出接受國泰款待豪遊法國參加收機團嘅人士中，只有鄭耀棠一人係行會成員，唔知係咪呢個原因，鄭耀棠出晒位兼出咗名，港大民研計劃喺九月九日至十三日做嘅行會成員民望調查顯示，最為人熟悉嘅五名成員中，鄭耀棠首度榜上有名。不過，其餘四人包括林煥光、葉劉、羅范及Starry嘅平均分數為四十七點七至五十六點二分不等，但係鄭耀棠只有四十一點六分。所以俗語有云，貪字得個貧，呢句話用嚟形容咁嘅情況，係咪好啱呢？