政情：發叔畀仔揼心口

設計不周 劉業強負責管理

鄉議局主席劉皇發個仔、負責鄉議局大樓管理嘅劉業強解釋，安裝閉路電視唔係為咗防盜，事關鄉議局大樓平時唔使開會，都將會議廳、大劇院同禮堂出租畀其他團體使用，例如搞吓畢業典禮咁，對上三個月發覺出租率愈來愈高，但點知大樓內嘅設施損壞率亦愈來愈高，例如有啲團體用完鄉議局個場後，入面好似打完仗咁，啲枱枱櫈櫈爛晒，但口同鼻拗好難話邊個唔啱，惟有建議大樓喺唔同盲點安裝十三個閉路電視，單係呢筆費用預計近八萬蚊。

劉業強話鄉議局大樓內一向有閉路電視系統，只不過有十幾個盲點無覆蓋。問題係點解當年安裝閉路電視唔覆蓋盲點呢？劉業強話佢要了解吓，睇吓當年係邊個負責設計閉路電視覆蓋點。

裝天眼換燈膽 埋單逾十萬

閉路電視可能同外來租用者唔守規矩有關，但劉業強尋日除咗要求鄉議局撥款八萬蚊整閉路電視外，仲要求鄉議局科水兩萬七千蚊，將大禮堂天花板嘅燈光設備換做LED慳電燈膽。原來當年設計有嚴重漏洞，舞台射燈一旦長開，既容易報銷亦勁浪費電力，搞到鄉議局每個月用喺射燈嘅電費都高達三千蚊。

所以劉業強嗱嗱聲建議先將兩組射燈轉用LED慳電膽，預計費用又要兩萬七千蚊。但唔好忘記，呢兩萬幾蚊只換到兩組射燈，如果換晒成個大禮堂嘅射燈，相信都要十幾萬埋單。今次就加裝閉路電視加換燈膽，唔知下次大樓又有咩甩漏呢？話晒劉業強嘅老豆發叔仲做緊鄉議局主席，如果鄉議局要撲水籌錢做維修工程，最尾都係要揼發叔心口，所以劉業強做得好啲，絕對可以幫老豆慳住個荷包。