中環出更：方文雄魏華星膺城大院士
David喺頒授典禮上發言指，中國近年來無論科技同經濟上都突飛猛進，只可惜「輝煌」嘅成就只流於硬件嘅建設，論軟實力還是十分落後。佢話內地經常出現嘅黑心食品、環境污染，同埋觀光客種種失禮嘅行為，實在令中國人蒙羞，而外國人對中國人嘅態度，亦只繫於「睇錢份上」嘅層次。故此中國人若要得到外國人嘅真正尊重，文化上非要大舉建設不可。David話假如有朝一日，時裝同音樂嘅潮流由中國帶領，咁至稱得上強國盛世。
另一位獲頒榮譽院士嘅係「Green Monday」創辨人之一嘅魏華星(Francis)，Francis話以商業手法來解決社會問題，以及鼓吹素食嘅潮流，以往大家不但覺得難以想像，仲會認為意念瘋狂，然而只要堅持理念，舊時被喻為小眾嘅想法己為大眾所接納。Francis自今年開始每天都食素，使熱愛長跑嘅佢，耐力更勝從前。
陳曼琪唯一女士獲頒
一眾精英之中，黃大仙區議員陳曼琪（Maggie）係唯一嘅女士。以律師為本業嘅Maggie，話普羅大眾都以為律師嘅收入好高，其實事務律師嘅標準收費受司法機構所限，九七年至今未曾更改。身兼中小型律師行協會會長嘅Maggie，現時嘅目標就係為同行爭取合理嘅標準收費。
卓妮