內地無奇不有，「明領養、暗販嬰」早就唔係新聞，估唔到北風南漸，有香港人亦幾乎被捲入呢股販嬰歪風，問你怕未！
唔係功夫茶亂噏o架，內地有中介公司及網站聲稱提供一條龍「領養」服務，只需付出二至十萬元，就可以「領養」嬰兒，仲有專人代辦出生證、戶口及「出生醫學證明」添。中介網站仲話，只要資料齊全，申請嬰兒來港定居並非無可能喎。
話就話係領養，其實根本就係販嬰，仲要明買明賣，提供一條龍服務，而當局居然視而不見，見而不理。唉，呢個究竟係乜嘢社會！
正所謂，有需求就有市場。港人李太同丈夫結婚多年膝下猶虛，從網上得悉廣州有「領養嬰兒」服務，睇過相片後，覺得其中一個女嬰幾合眼緣，決定上廣州一試。本報記者直擊整個過程，發現賣方係一位廣西女人，因為屋企重男輕女，加上家境貧困，所以決定將出生不久嘅女兒「送」畀有心人撫養。佢口口聲聲否認賣女，仲話收取八萬元只係「補償金」，至於戶口、出生證明等等，只要另付六千幾元，就可以搵專人代辦，叫李太放心喎。好彩李太擔心難以申請女嬰來港，最終決定放棄，先至冇落疊咋。
有頭髮冇人想做瘌痢，如果家庭條件許可，世上唔會有父母捨得放棄親生骨肉。內地販嬰潮之所以禁之不絕，好大程度係一孩政策及重男輕女思想所致，但無論點都好，呢種不道德嘅行為絕對應該受到譴責。不可不知，無論係內地定香港，販嬰都係犯法，內地賣嬰一方固然會被追究刑責，港人買嬰一方使用虛假文書將嬰兒申請來港，同樣難逃刑責，隨時坐監o架。正如律師話齋，港人只能領養內地孤兒，被領養兒童需得到當地民政局確認係孤兒，辦理正式領養手續後，先至可以向當地公安局申請單程證來港定居；如果使用虛假文書將領養兒童申請來港，一經定罪，最高判刑十四年。嗱，大家千祈唔好助紂為虐、以身試法吖。
俗語話，虎毒不食子。老虎咁兇惡咁狠毒，亦唔會食自己親生骨肉，反而人類居然將自己親生嬰兒當貨物出賣，簡直可悲。冇法子喇，當今神州道德淪落，人人向錢看，乜嘢事都有人做，好彩冇人敢食人肉咋，否則更奇怪嘅事都有吖。唔怪得有人話中華民族已到咗最缺德嘅時候，真係一啲都冇講錯。
講開又講，過去只會喺內地出現嘅歪風邪氣，近年亦逐漸吹到香港，販嬰係咁，貪腐亦係咁，再咁落去，一國兩制好快就變成一國一制嘅喇！