政情：公民廣場：醉貓守後欄顯明庇蔭

由特首委任嘅廉政公署獨立檢討委員會報告，揭露「貪湯」前廉政專員湯顯明在任期間犯下十八宗違規事項，主要濫用公帑豪飲、豪送禮物，仲喺「貪曾」前特首曾蔭權爵士縱容下瘋狂外訪豪遊。曾任廉署調查主任嘅大律師查錫我尋日就質疑貪曾當年點解要搵外號「醉貓」嘅貪湯去做廉政專員，令人猜疑貪曾因自知貪小便宜易出事，所以特登搵貪湯守住自己個後欄。如果呢個講法屬實，咁貪曾同貪湯就係互相包庇，唔怪得貪曾對貪湯亂使公帑「隻眼開隻眼閉」，而貪曾在任時貪盡海陸空、歎盡省港澳嘅貪腐醜聞，貪湯當睇唔到喇！