立法會去年通過《競爭條例》，競爭事務委員會（競委會）依家處於早期籌組階段，正所謂「蛇無頭不行」，最近開始聘請包括行政總裁在內共五名高層管理人員。
聞說呢五名高層管理人員嘅薪酬最高上限可同首長級第八級（D8）相同，為二十二萬四千多元，下限係月薪近十四萬元嘅首長級第二級（D2），粗略估計呢五名高層管理人員年薪合共將近千萬元。
根據競委會最近刊登嘅招聘廣告，呢五名高層管理人員嘅入職要求，應具備競爭法或經濟學學歷或專業資格，需要至少十年獲得專業資格後有關工作經驗，相關招聘截止申請日期係下月十五日，目標係明年首季末或第二季初可履新，其中行政總裁一職須由特首委任。
除咗密鑼緊鼓開始聘請高層同中下層人員外，競委會秘書處嘅辦公室將於年底由舊政府總部搬遷至灣仔胡忠大廈。競委會連串行動都要以錢行先，究竟係咪物有所值，就要視乎將來能否將反競爭行為嘅大老虎「落鑊」喇！