中環出更：潮青拉大隊 食有營監倉飯
同監獄有關嘅電影大家可能睇得多，但現實嘅監獄又係點嘅呢？尋日潮州商會青委主任葉振南（Stephen）同名譽參事劉文文（Lisa）拉埋成班「加己冷」成員，參觀赤柱監獄及柴灣歌連臣角懲教所。卓妮都有隨行見識吓，見證大家喺監獄入面一嘗「監倉飯」滋味，原來監倉膳食豐富，有炸魚、雞翼、咖喱、素菜等餐單選擇，大家都話估唔到味道都幾好喎。
大家試食後，都覺得食物比較少油同清淡，原來係營養師精心設計嘅餐單，難怪個個囚犯刑滿出獄，都清減唔少。據懲教署人員介紹，負責煮食嘅五十多個囚犯，有啲每朝凌晨四點鐘就起床，供應膳食予全倉共千多個囚犯。不過，執勤嘅懲教署人員就冇份食喇，事關佢哋每日工作七小時，期間不設食飯時間。一眾潮青親身參觀過監獄後，個個都相當難忘。
現代囚犯 唔只「揼石仔」
其實Stephen同Lisa不時以太平紳士身份探訪監獄，二人話希望透過今次參觀，令大家脫下「有色眼鏡」，協助囚犯重過新生。署理懲教署署長邱子昭話，唔少人對囚犯嘅印象，仲停留喺「揼石仔」嘅畫面，但其實監獄係想讓囚犯學習各種技能。市民日常生活中見到嘅路標、交通燈、垃圾桶，仲有政府部門用嘅桌椅、信封，警務人員着嘅制服、鞋履，都係出自監獄工場。署方仲好鼓勵囚犯進修，有啲仲讀到碩士畢業添！
卓妮