根據林立志上載社交網站嘅聲明，係同抗議阿謙去年自動當選區議會功能界別議員時嘅聲明差唔多，聲明除咗強調自己冇投過票畀阿謙，又批評佢喺上屆區議會提出多項參選政綱，好似「爭取區議員開設辦事處津貼由十萬元，升至十二萬元」，全部都冇「成功爭取」過。
其身不正 點做區會代表
回顧阿謙過去一年「政績」，好似佢極力爭取區議員外訪津貼，但自己上月就帶埋個女參加國泰法國豪華「收機團」，回港後仲恃住自己循區議會功能界別當選，就唔使向選民交代而堅拒回水。呢次風波不但誓必收緊立法會議員外訪規矩，區議員想獲津貼外訪就更加難過登天。阿謙「成事不足，敗事有餘」，竟然仲夠膽落區話自己係區議會代表？