不滿抄牌 索女喪鬧警員
索女食「牛肉乾」發爛渣，搣行車證喪鬧警員！前日網上瘋傳短片，指元朗炮仗坊一名任職地產公司董事的女司機，疑不滿遭警員抄牌，在街頭不停喪鬧警員，期間有目擊事件的網民指證，她即舉機反拍對方；警員抄牌期間，索女擬欲硬搶警員手上告票簿，更以「閃電手」伸入車內搣走行車證，最終因涉嫌阻差辦公被捕。索女行徑被上載上網即被網民喪鬧：「呢啲女人真係惡，連警察都唔驚！」索女則呼冤：「有合作畀警員抄牌，又指比成件事搞到精神崩潰，寢食難安！」
該段名「元朗炮仗坊可愛大胸美女 亂泊車愛罵人」短片，自前日上載互聯網至今，已有逾三萬點擊率。事發於前日下午三時許，當時一名身穿藍色連身裙，駕白色七人車的姓朱（卅二歲）女子，疑不滿警員向她派「牛肉乾」大發雷霆，眾目睽睽下狂鬧抄牌警員：「你無權抄我牌」、「你咩意思先？我已經走緊，係你截停我。」
女事主為地產公司董事
擾攘期間，朱擬伸手搶走警員告票簿，更一度搣走行車證力阻警員抄牌。一名拍片網民聲稱目擊事發經過：「我見到阿Sir喺前面叫佢（女司機）走，但佢轉頭又返嚟！」朱隨即舉機反拍對方，又問「你係咪有精神病？」、「點解你要做架兩，係咪好得閒？」該網民不甘示弱，反唇相稽：「我只係盡好市民嘅責任！」朱其後返回車廂欲驅車離開，但被警員制止。警員同時通知上級增援，不久多名警員到場包圍七人車調查。
警方調查後，鑑於已多次向朱發出口頭警告但不獲理會，故以涉嫌「妨礙警務人員執行職務」把她拘捕，目前獲准保釋候查，在本月下旬向警方報到，警方會繼續跟進女司機涉嫌違例泊車事件。據悉，朱是元朗一間地產公司董事，網民更爆料指有人經常在地產舖內與顧客爭執。
片段前日曝光後，旋即引來網民瘋狂轉載熱議，除有網民直斥朱行為離譜，亦不乏有人主持公道：「其實可能係阿Sir嘅指示唔清晰，不如睇埋女司機車頭段片至定罪啦！」
姓朱女司機回覆本報時澄清：「當時有畀行車證給警員抄牌，但最終都冇收告票；又指當時有網民拍片阻住晒，搞到精神緊張！」她又指座駕攝錄鏡頭已把過程錄下，可證清白，惟警方沒有取閱。