街市壞電梯 長者難買餸
「我哋日日都要上去買餸，行到上去腳仔都軟埋，（扶手電梯）壞咗成個幾月都仲未整好，我哋呢啲老人家真係好辛苦！」深水埗街坊盧伯每日均到北河街街市購物，發現其中一個入口的扶手電梯損壞多時，一直未見食環署派員維修，街坊需繞路到另一入口乘搭電梯，對長者造成不便。
「搵《東方》轉個頭整好」
食物環境衞生署發言人指出，根據紀錄，上址街市其中兩部自動電梯於七月中旬出現故障，承建商已即時進行檢查，發現其電力裝置因水浸而損壞，兩部自動梯更換零件後已恢復運作。
「一搵《東方》幫手，轉個頭就已經整好，真係快手！」盧伯證實扶手電梯現已恢復運作，要求食環署日後需安排承建商定期檢查電梯機件，做好保養工作，避免問題再次發生。