大家應該聽過類似嘅講法，陳大文呢個名咁普通，一個招牌跌落街都砸死十個八個啦。咁嘅講法除咗比較尖酸刻薄之外，更加反映一個相當悲哀嘅現象，招牌真係好容易跌落街o架，尤其係飽歷風霜冇人理嘅爛鬼招牌，日久失修吊吊揈隨時成為致命嘅殺人兇器。
就講日前嘅驚險事件吖，深水埗福榮街一間以美味馳名嘅食肆門外，一個巨型燈箱招牌砰嘭一嘢跌落街，好彩食客以及街坊爭相走避閃得快咋，否則搞出人命都有之。路邊一架四驅車就唔好彩嘞，慘遭招牌壓毀車頂。爛鬼招牌嘅主人家係邊一位呢？原來係屬於一間沖印店嘅，不過幾年前已經搬走咗。
唔知係痛定思痛定係後知後覺，屋宇署署長區載佳話喎，本港現時有大量外牆招牌，大部分都係違例安裝，為咗確保安全起見，署方推出「違例招牌檢核計劃」。屋宇署委託合資格人士檢驗招牌，並向屋宇署提交安全證明，之後每五年要再檢驗。區載佳仲話，若然發現危險招牌，署方會發出告示要求拆除，如不遵從會派承建商清拆，然後向負責人收費。屋宇署每年目標係清拆一千六百個危險招牌，以及每年二百五十個暫時冇危險但大型嘅違例招牌。
聽完區載佳一席話，功夫茶心有慼慼然，點解呢？無他嘅，清拆危險招牌呢家嘢其實早就應該做啦，一來有機會拯救生命，二來有可能振興經濟。幾年前灣仔有一個三百磅招牌跌落街，砸死一個無辜到極嘅女途人，假如違例招牌檢核計劃早幾年推出，或者唔會有人橫死街頭。
至於拆招牌振興經濟，聽落雖然好鬼死滑稽，有少少誇張，有少少硬膠，不過咁嘅構思唔係功夫茶發明o架。始作俑者嗰一個智障級天才叫做曾蔭權，呢一個前特首未晚節不保捲入一連串貪腐醜聞之前，率領一個名叫「經濟機遇委員會」嘅物體，四年幾前為咗刺激當時疲不能興嘅經濟，佢哋左度度右度度提出一個構思，政府撥出一千八百萬元，畀屋宇署清拆五千個危險招牌，咁樣做就可以製造一百七十個職位。
大家諗一諗，四年幾前已經話要清拆五千個危險招牌，到咗今時今日先至舊調重彈，打算一年清拆一千六百個危險招牌，你話貪曾任內所謂嘅福為民開係咪呃鬼食豆腐吖？唔理拆招牌係咪足以振興經濟，懶懶閒嘅官僚態度已經令人忐忑不安啦，點知幾時禍從天降o架！
點都好啦，唔該屋宇署講得出做得到，畢竟遲到好過冇到，危險招牌一定要盡快拆拆拆！