泛民主派和建制派在政治立場上南轅北轍，但尋日卻罕有地站在同一陣線，來自跨黨派合共二十三名西貢區議員，提出動議譴責獨立議員方國珊喺未經合法申請下進行街頭籌款，行為嚴重影響區議會嘅聲譽及公信力，但因為方國珊尋日不在場暫未就動議進行表決。根據有關聯署譴責聲明內容，指警方亦正式就上述投訴展開調查。
西貢區議會本身有二十九名議員，撇除主席吳仕福，有超過八成嘅二十三名跨黨派議員，包括民主黨、新民主同盟、民建聯、工聯會同公民力量五大政黨政團，聯署譴責方國珊違反區議員操守指引，無聯署嘅有五人，包括曾經同哪吒一同反對擴建將軍澳堆填區嘅陳繼偉。
有熟悉議事規則人士話，由於今次聯署譴責僅限於區議會，若發生在立法會，只要有三分二議員通過譴責就會喪失議席。另外，跨黨派二十多名西貢區議員發出新聞稿，講述上周五與環境局局長黃錦星會面情況，指方國珊當日「不斷鼓動示威者」，擔心方國珊及示威者進入會議室，會面必被打斷或需要腰斬，希望對方國珊自我反省。
方國珊否認非法籌款，只係有段時間進行「預先推廣」，強調已跟足程序辦事，但在申請籌款牌照過程上遭人留難，若因此造成任何誤會，表示歉意。佢又否認被指鼓動示威者嘅指控，強調指控與事實不符。