政情：伊院慶金禧 名醫話當年
尋日係伊利沙伯醫院成立五十周年嘅大日子，經歷過嘉利大廈大火、沙士疫症，仲栽培過唔少醫生，講得上係訓練名醫嘅少林寺。食衞局局長高永文尋日都話當年，佢做實習醫生時都喺伊院跟賴福明醫生學嘢，後來仲成日去伊院搞工會活動添，所以同伊院有好深淵源。
病人爆滿 跪低睇症
為咗慶祝伊院金禧紀念，尋日就搞咗個《伊院人．情．事》嘅口述歷史書發布會，除咗高局長作為前實習醫生講番「當年今日」趣聞趣事，伊院第二任行政總監賴福明都話，喺伊院度過嘅四年都幾辛苦，冇乜好日子過，好在同事同心協力做嘢，早年伊院病人逼爆，走廊擺晒帆布病床，睇症都要跪低睇。
醫管局署理行政總裁張偉麟就感慨話，伊院啟用時，佢仲係小一學生，之後伊院服務愈來愈好，佢都打過伊院工，「以前一個病房八十個病人，三個醫生做晒，走廊、（車立）口、廁所邊都瞓晒病人，醫生夜晚忙到冇得瞓。」佢仲難忘伊院好有人情喎。