政情：黑英轟茂論 思想癌細胞
早前透過網誌「局長隨筆」硬銷新界東北發展計劃嘅發展局局長陳茂波，日前又再撰文質疑發展郊野公園係咪完全冇得傾、唔掂得，更擺烏龍將郊野公園佔地由四成「發水」至七成。被視為「梁粉」嘅天文台前台長林超英（黑英）都睇唔過眼，鬧爆茂波嘅言論係「思想癌細胞」、「諗都唔好諗」，又話假如市民今日讓一寸，明日就要讓一尺甚至一丈，擺明阻止茂波嘅「思想癌細胞」擴散。
黑英去年幫特首梁振英（CY）撰寫環保政綱，競選期間又為CY站台，自然被歸類為「梁粉」，但發展郊野公園呢類惹火議題，自然觸碰到「環保戰士」黑英嘅神經，尋日一於開咪大戰茂波呢位「鍵盤戰士」。黑英退休後身兼中大客席教授，比起做會計起家嘅茂波更熟書，所以佢一坐低就先指正茂波嘅「七成」郊野公園論。
警告港府勿自毀長城
眾所周知黑英愛花鳥蟲魚如命，佢先係力銷郊野公園係港人引以為傲嘅珍貴資源，連外國人發夢都諗唔到三十分鐘車程就可以穿越繁忙鬧市，一覽「山懷抱住海、海懷抱住山」嘅美景，批評政府過去「個海就填咗佢，啲魚就唔使睬佢」，專搞啲花鳥樹木、唔識講嘢嘅郊野公園，有人嘅地方就唔敢掂。
講講吓黑英更警告香港嘅山脊同風水已經開始爛，政府唔應該自毀長城，仲發展局局長上身，建議開發棕土（brownfield sites）、好似天水圍以西一帶嘅貨櫃場呢類已經「搞爛咗嘅鄉郊土地」。面對大是大非嘅環保議題，黑英話知自己係咩粉，一於落足子彈開火，邊個都冇面畀。
「局長奶媽」代波撲火
另一邊廂，曾任發展局局長嘅政務司司長林鄭月娥，尋日就出席同政務司職務九唔搭八嘅「古蹟周遊樂」開幕典禮，未知係咪又做「局長奶媽」，代唔生性嘅茂波應對傳媒，佢仲自爆過去對外介紹香港，都有一幀幻燈片介紹香港有四成六郊野公園土地，強調政府非常、非常重視郊野公園。可惜無論林鄭點兜，茂波呢個郊野公園火頭都睇怕有排燒，真係星星之火，可以燎原。