臨近退休仍外訪 衞署又益自己友

功夫茶愈來愈相信,衞生署可能係最疏爽嘅政府部門,疏爽之處係上司對下屬非常慷慨,迹近有求必應嘅黃大仙級數。問題係,署方嘅疏爽根本就係慷納稅人之慨,咁就唔講得笑嘞。

衞生署接二連三以種種方法益自己友,有個助理署長蔡美儀,放假一年考大狀,居然獲批全年照支薪金一百六十萬元。有個口腔頜面外科主任李烱康,退休之後未經公開招聘程序就得到翻閹待遇,獲聘為威爾斯親王醫院口腔頜面外科兼職高級臨床醫生。最新一個受益人係助理署長梁士莉,明年四月就要退休o架嘞,今年八月竟然獲批公幹外訪,出埠嘅目的地係風光明媚嘅澳洲。

假如大家一時之間唔明白,臨近退休先至公幹外訪有乜嘢問題,不如溫故知新啦。記唔記得前特首曾蔭權爵士未執包袱落台之前做過乜嘢事呀?冇錯嘞,呢一位晚節不保嘅香港第一貪官又係臨近退休頻頻出埠,令人質疑佢盡地一煲假公濟私,成為貪曾罪狀之一。你知啦,貪威識食嘅貪曾每次外訪都要堅持入住總統套房,再加上外訪完之後已經時日無多,卸任特首之前嘅所謂公幹根本毫無意義可言。打個譬喻吖,會唔會有人臨近世界末日嘅時候,走去進修園藝學習綠化環境吖?

好嘞,講番梁士莉,本報接獲署名「不平人士」寄畀公務員事務局局長嘅投訴信,內容係批評一名將近退休嘅衞生署助理署長,獲批全額有薪假期去澳洲培訓同公事探訪,而且喺公幹日期之前出發,喺澳洲享用三日私人假期。投訴人認為,署方如果以培訓專才為由批出假期仲算合理,之但係批畀一個將近退休嘅員工就冇必要嘞。公務員事務局證實,最近接獲一宗有關衞生署海外培訓嘅投訴,已轉交該署跟進。

大家如果熟悉本地時事,長時間留意官場動態,應該記得港產官僚有一個好常見嘅特點,就係出埠外訪經常涉及公帑私用。有離岸特首之稱嘅貪曾唔使多講啦,前廉政專員湯顯明亦係差不多,至於平等機會委員會咯喎,歷任主席落台嘅原因都離唔開假公濟私瘋狂外遊。亦即係話,名義上嘅外訪公幹往往係上下其手嘅好機會。

既然衞生署一次又一次涉嫌浪費公帑益自己友,功夫茶強烈呼籲公務員事務局深入調查。你知啦,香港家陣嘅全球廉潔指數排名每況愈下,本來賴以自豪嘅核心價值廉潔奉公黯然失色,確係唔容許再有腐敗分子有辱門楣o架。若然公務員事務局查到乜嘢蛛絲馬迹,交由廉署切實跟進啦,唔該!