立法會下個月復會，唔少議員都趁開工前作最後衝刺四圍飛。新民黨正、副主席葉劉淑儀同田北辰（田二少）就分別飛赴歐洲南部同吉林「考察」。田二少今次以港區人大代表身份隨團出發，參觀東北亞投資貿易博覽會，但期間竟有艷遇，自爆同當地人民朝鮮族歌舞團嘅美女團員合照，仲上載社交網站添。
田二少亦有隨團到訪吉林勝地長白山，面對當地變幻莫測嘅天氣忽然有感而發，聯想起香港政治氣候亦都可以一日內翻天覆地，感慨「政治的變幻、無常，有時比長白山天氣更難預測」，似乎田二少喺呢次旅程相當有體會。田二少仲有機會，去到中國、俄羅斯同朝鮮嘅邊境，真係難得喇。
葉太前日亦上載安坐商務客位嘅相，一切準備就緒衝上雲霄。不過，原來葉太從未踏足過意大利、西班牙等地，相反以往任職政府嗰時，飛得最多嘅竟然係歐盟總部所在地，即比利時布魯塞爾。