政情:貪得無厭 曾出賤招

「貪曾」前特首曾蔭權爵士嘅貪小便宜行徑,真係層出不窮,揭之不絕。早前我哋踢爆貪曾在任時,禮賓府同特首辦內擺滿佢喺外訪期間收收埋埋,以及從內地各省市政府同企業主動送嚟嘅禮物。報道出街後無耐,即刻有「不平人」聯絡本報再爆多一單貪曾嘅貪心史,話佢出賤招呃多個國產電飯煲自用。

「我屋企要用兩電飯煲」

話說貪曾出任特首後,有一次率領大批港商出訪珠三角某個城市,期間參觀咗一間國內知名電器生產商嘅廠房,之後廠方按照內地官場陋習,向貪曾送上一個全間廠最新最貴嘅電飯煲做紀念品。想當年香港仲係經常發生內地電器無故起火甚至爆炸嘅事故,但係貪曾一於貪得唔好嘥,對呢個國產電飯煲趨之若鶩,仲扮晒不經意咁講咗一句:「我屋企要用兩個電飯煲o架!」

廠方代表聽到貪曾咁講,睇怕都會即場送多個煲畀佢。由於貪曾係率領港商參觀,佢公然貪多個電飯煲嘅舉動令在場人士側目,堂堂特首有大事唔做,講到明屋企要用兩個飯煲煮飯,羞家到團員都想搵窿捐。

貪曾去參觀,順便乜都擸,總之大小通吃唔好嘥。有一次貪曾拜訪內地一間玩具廠,對方亦送咗大批幼兒玩具畀佢。當年貪曾兩個仔早已經係成年人,佢又未夠鐘抱孫,玩具對佢嚟講,理應得物無所用,但貪曾亦笑騎騎照收可也,隨時留到依家畀自己啲孫仔孫女用。

月餅雞蛋玩具乜都照擸

不經意貪多啲,完全係貪曾乜都貪嘅行徑,所以佢先至要咁大間深圳禮賓府去擺放佢貪返嚟嘅物資。講到電飯煲,就令人諗起貪曾夫婦○五年入住禮賓府後,多次收受一名省級政協常委「進貢」冰鮮葵花雞、葵花雞雞蛋同增城菜心等美食,咁好餸,當然要食多啲飯啦。

就快中秋,貪曾有權有勢時,當然好多人送禮。佢習慣將全部禮物叫司機擸晒返屋企,唔會同同事分享,月餅擺到過晒期,至當甜品請人食。不過當佢發現月餅過期,佢就拍枱問:「邊個送嚟o架?」今年中秋唔知仲有冇人送月餅畀佢呢?

第一手消息請下載on.cc東方互動iPhone/iPad/Android/Windows Phone Apps