中環出更：名人爭攞開季頭彩

彭太話，愛駒喺上個馬季煞科賽跑第三，當時佢身在日本開會，Victor惟有致電向佢報喜，佢聞訊後即刻買新衫慶祝。尋日佢着住新買嘅彩色花裙為良駒打氣，結果就贏咗，認真當旺。彭太已非首次喺開鑼賽贏馬，佢哋已退役嘅駿駒「同歡笑」，亦曾於開鑼日奪冠。

郭少明乖孫成全場焦點

莎莎國際主席郭少明（Simon）亦鴻運當頭，佢隻靚駒「美麗昇華」以大熱姿態跑出，袋走近八十萬元獎金。Simon舉家現身拉頭馬，人見人愛嘅乖孫陳頌言（Jacob）一出場就搶晒外公鏡，個個爭住要同佢玩，後來Jacob可能怕生暴，喺爸爸陳振邦嘅懷中扭計，要媽媽郭詩慧出辦法氹番。

彭徐美雲（中）悉心打扮入場等贏馬，結果如願以償，丈夫彭曉明（右）及囝囝彭穎生都好興奮。（徐家浩攝）

東華三院總理黃業光（中）細女愷欣（左二）尋日牛一，太太吳曉婷（右二）、大女愷珊（右一）及細仔愷俊（左一）齊齊入場慶祝。

東華三院總理黃業光（John）都喺度，佢同太太吳曉婷、大女愷珊、細女愷欣及孺仔愷俊一家五口溫馨現身，為佢有份擁有嘅團體馬「赤驥」打氣，可惜愛駒首度出賽欠缺經驗，最終三甲不入。John話，其實尋日咁啱係愷欣生日，所以舉家入場食飯為愛女慶祝。

卓妮