政情：今日你上鏡：啟剛遲大到 忙湊仔？

剛為人父嘅香港青年聯會主席霍啟剛，繼前日主持青聯就職禮後，尋日又出席青年交流促進聯會就職禮，但佢尋日卻姍姍來遲，遲咗半個鐘，莫非因為忙住湊仔？原來係啟剛同主辦單位溝通上有啲誤會，幸好最後都趕得切到場影大合照，事後佢亦好有禮貌主動向多名主禮嘉賓解釋事件嘅前因後果。其後啟剛又大談兒子最新情況，自言會小心翼翼照顧兒子，因為覺得兒子仲係好脆弱。當被問及會否向爸爸霍震霆請教湊仔經時，啟剛就話依家爸爸正在南美出席會議，仲等待佢為BB改名喎。