茶餐廳文化深入民心，凍飲加兩蚊應該係常識喇啩。之不過好多人唔明白，點解凍飲要加兩蚊呢？其實答案好簡單，因為大部分茶餐廳用嘅冰塊唔係自家製造，而係向製冰工場花錢入貨，羊毛出在羊身上吖嘛，顧客唔要熱飲要凍飲就必須額外繳付「冰塊附加費」。
天時暑熱一杯凍飲落肚確係透心涼，問題係大家有冇諗過「冰從何來」呢？東方報業集團嘅神聖任務係為民請命，為咗了解本地食肆使用冰塊嘅情況，本報記者巡查中環、佐敦以及大埔嘅食肆，發現大部分擁有開放式水吧嘅冰櫃經常中門大開，職員取冰之後冇將櫃門關好。記者從八間食肆取得冰塊樣本，送交香港標準及檢定中心化驗。
化驗有乜嘢結果呢？講出嚟嚇你一驚，冰塊含糞呀，冇陰功！
八個冰塊樣本之中，有五個嘅大腸菌群含量超出《即食食品微生物含量指引》規定，當中四個係散裝冰，一個係包裝冰。來自佐敦一間茶餐廳嘅冰塊樣本最嚴重，大腸菌群超標三十九倍。身兼香港大學微生物學系榮譽副教授嘅臨床細菌學家任永昌就話嘞，需氧菌落計數、大腸桿菌及大腸菌群都係檢測冰塊有否受環境污染嘅三個指標，一旦冰塊驗出大腸桿菌，即係反映受到糞便污染，不適合飲用。大腸菌群嘅存在顯示污染來源有機會來自糞便或處理冰塊時衞生環境欠佳，需氧菌落計數嘅多寡顯示冰塊處理時衞生環境優劣。
簡單咁講，凍飲加兩蚊隨時令你無辜辜飲糞水！
冰塊含糞沖凍飲，究竟邊個係罪魁禍首呢？餐飲聯業協會會長黃家和指出，現時本港有幾間領有牌照嘅製冰工場，食肆購入冰塊後會放入冰櫃或隔熱冰盒，不過業界發現有好多無牌製冰廠，佢哋供應嘅冰衞生成疑，政府應該嚴格做好源頭監控。
莫講話無牌製冰廠有必要取締，即使係有牌製冰廠，政府都有責任確保萬無一失。至於食肆咯喎，環境衞生都好重要，若然員工去完廁所唔洗手，然後沖出加料炮製嘅糞水凍飲，隨時引發腸胃炎甚至屙到出血o架，該煨！
你知啦，特區政府負責食物安全嘅官僚好多時候得過且過，把關不嚴係長期弊病。所以功夫茶非常誠懇咁呼籲衞生部門嘅官老爺，閣下都唔想自己或者家人享用凍飲嘅時候一個二個變成「屎撈人」o架，咁就要加緊巡查，如果繼續監控乏力，任由冰塊處理過程出現害人不淺嘅「攪屎棍」，凍飲加兩蚊簡直係賠了夫人又折兵啦！