政情：公民講場：運動員攞牌德成叨光快

香港單車好手陳振興成功喺全運會山地越野單車賽奪得銅牌，身在瀋陽嘅民政事務局局長曾德成唔知係咪一早收到風有得攞威，晨早去單車比賽場地等陳振興凱旋而回，結果陳振興真係成功奪得銅牌，德成局長當然立即極速上前握手兼合照啦，又透過新聞處發聲明祝賀有運動員攞獎牌，反應十分快。不過，早前大球場爛地慘變大農場，又唔見德成局長咁快出嚟解釋，件事拖咗幾日先見佢開金口，有鑊就閃人，有威就識攞，如果全運會有「男子單人叨光比賽」，佢一定幫香港奪金。