政情：又一山人又一經典卡片
派卡片係件好平常嘅事，但本地著名視覺藝術家「又一山人」黃炳培（Stanley），就有辦法將呢件事變得好唔平凡，令收卡片嘅人留下深刻印象。佢用咗張好輕、好薄、好易皺嘅銀色錫紙，印上簡潔嘅黑色字體做卡片，派畀人時仲刻意整皺佢，認真別出心裁。
皺錫紙顯創意
Stanley解釋，做廣告藝術呢一行，創意係好重要嘅元素，錫紙可以隨意扭曲成任何形狀，令佢派畀人嘅每一張卡片，都呈現出唔同嘅形態，充分表達到佢嘅無限創意。咪以為喺一張錫紙上面印字好簡單，Stanley話製造錫紙卡片其實好高難度，成本亦比正常嘅貴好多，經佢反覆試過好多種印刷技術至成功。
除咗錫紙之外，Stanley仲試過用多種喜愛嘅物料造卡片，包括利用明信片咁大嘅紅白藍膠布，以及用木片刻字做卡片，務求保持新鮮感。佢笑言，有人將佢嘅卡片當做藝術品咁珍藏。