政情：麥美娟議辦開張接連甩轆

立法會議員麥美娟（Alice）繼上月喺大窩口開咗佢第一個辦事處後，尋日就同超級議員陳婉嫻（嫻姐）喺佢服務咗近三十年嘅青衣開設聯合辦事處，但開幕禮期間就接二連三發生甩轆事件。話說Alice喺青衣碼頭舉行辦事處開幕，安排一段近十分鐘嘅醒獅表演，點知舞獅期間，舞獅頭嘅師傅突然叉錯腳跌咗落地，引起全場尖叫，好彩師傅身手敏捷，有驚無險。
切燒豬無刀，陳婉嫻（左二）作狀以手扮刀劈落隻燒豬度。（鄧湄攝）
切燒豬無刀，陳婉嫻（左二）作狀以手扮刀劈落隻燒豬度。（鄧湄攝）

嫻姐手刀「切」燒豬

舞完獅之後又爆出蝦碌鏡頭，話說當三隻大燒豬被搬到辦事處外等候嘉賓手起刀落時，大家先至發現無刀用，嫻姐就笑笑口扮女殺手，用手嚟扮刀劈落去，Alice就急急腳入辦事處搵刀補鑊，唔知邊個負責準備切燒豬嘅刀呢？呢啲話晒都係意頭嘢，無刀又點殺敵呀？Alice事後強調，今次請嚟嘅醒獅團隊曾參加國際賽，可能係一時失手。不過，無論係點佢都好開心，皆因佢哥哥同細佬都有去捧場喎。

麥美娟（中）青衣議員辦事處開幕，獲哥哥（右）同細佬（左）撐場。
  • 麥美娟（中）青衣議員辦事處開幕，獲哥哥（右）同細佬（左）撐場。

第一手消息請下載on.cc東方互動iPhone/iPad/Android/Windows Phone Apps