政情：補選拒勸退田少舔到盡

換「祝福」後年區選

由於民協林健文喺前年選舉只以兩票落敗，如果佢參加補選，贏面高過原議員梁偉權好多，所以迫使西環易將派出新人鄧浩斌參選。如果兩人單打獨鬥，加上建制派啟動龐大選舉機器，要贏都唔係無機會。不過，呢個如意算盤一早就打唔響，事關呢個中產選區自從傳出需要補選後，自由黨大半年前已派出會計師符傳富落區，街坊初步反應唔錯，加上該黨多位核心成員都係當區居民，有助拉攏街坊票源。

聽聞西環分析選情後，決定勸退自由黨，等建制票源全部集中喺鄧浩斌身上。西環唔想該黨兩手空空，決定以「祝福」換取該黨收手。有油尖旺地區人士報料，九龍西近年有唔少私樓落成，預料二○一五年區議會都有兩、三個新選區，據聞西環打算「祝福」自由黨去新選區參選，以此利誘該黨放棄參加京士柏補選。

不過，呢招似乎吸引唔到自由黨，我哋問過田少，佢話無論坊間有咩講法都好，該黨已決定派人參加補選，仲話自己會聯同黨主席周梁淑怡（莎姐）齊齊撐黨友報名，以示聲勢。如果有需要，佢仲會親自落京士柏拉票，全個黨瞓身參選咁話。

咁搞法咪即係同西環打對台？有自由黨中人分析話，田少做「壞孩子」撐到底，直至未來兩場大選舉都會一樣，因為咁樣先有生存價值；如果西環講乜就照做乜，都唔代表會得寵，始終仲有其他建制派政黨爭食，所以「壞孩子」路線似乎係最佳選擇。話時話，做得建制派就要食得鹹魚抵得渴，難道會有自由意志嘅？