一代武打巨星李小龍逝世已四十載，但其招牌黃色戰衣、手持雙節棍嘅形象仍深入民心，粉絲更遍布世界各地。李小龍基金會近日借出逾四百件珍貴文物予香港文化博物館，作為期五年嘅公開展覽，讓觀眾感受李小龍對武術嘅熱愛。身兼基金會會長嘅李小龍女兒李香凝（Shannon）話，爸爸嘅人生哲學可啟發當今年輕人，影響力從未減退。
Shannon憶述，父親主要嘅人生宗旨係實現自我，即是要做自己、表達自己、相信自己，而唔係模仿一個成功嘅人。佢話，爸爸生前講過，自己係透過研習武術而獲得一生所學，藉住建立一套嚴格嘅紀律，考驗自己嘅能力。李小龍所創嘅一套武術哲學，係從精神及肉體上不斷磨練自我，以自身嘅力量克服威脅，並利用核心力量增強技術，呢啲理念都好值得現今年輕人學習。
今次展覽公開咗李小龍於拍攝電影期間手繪嘅動作構圖，又揭露佢鮮為人知嘅一面，原來佢好鍾意小動物，又愛寫信、寫詩，更曾寫低人生目標，立志要成為首位美國片酬最高嘅東方超級巨星。