中環出更：鍾國斌帶隊掃衫議員做潮男
立法會仲放緊悠長暑假，議員趁機攤抖吓叉叉電，有人外遊，亦有人尋找另類節目。紡織及製衣界議員鍾國斌（Felix）就相約兩位猛男議員陳恒鑌（Ben）同漁農界何俊賢（高佬賢），一齊去特賣場掃平貨，幫兩人改變形象，等佢哋唔使成日着住同一套西裝咁老套。三位男士行足三個鐘，總共使咗六千多元，拍得住愛靚瘋狂購物嘅女士們。
鴨脷洲聚集唔少工廠大廈，睇落好似無乜特別，但Felix透露，當中一棟專賣傢俬嘅工廈囊括全港最多知名國際品牌特賣場，由於識摸上門嘅人唔多，所以價錢相當超值，平時門市閒閒地一件過千元嘅T恤，嗰度只要幾百元就有交易。Felix一去到特賣場，就捉住高佬賢揀衫，主力推介顏色鮮艷嘅恤衫，教高佬賢要着多啲唔同類型嘅衫，先可以增加新鮮感。
高佬賢滿載而歸
高佬賢又高又瘦，佢話坊間好多衫都唔啱佢着，所以平日只能「望衫興嘆」，有得睇無得買。適逢特賣場內唔少衫尺寸較大，高佬賢攞住一大堆衫進出試身室，好快就揀到心頭好滿載而歸。之後Felix同高佬賢仲一齊睇中同一款但唔同顏色嘅人造皮褸，折實後盛惠一千七百元，仲話遲啲返立法會時要一齊着住去開會玩「撞衫」喎。
相比豪爽嘅高佬賢，阿Ben就較為小心，想齋睇唔買，事關佢話全身所有衫褲鞋襪都係由老婆代購，自己好少會行街買衫。不過，喺Felix嘅不斷慫恿下，阿Ben最終都係買咗件黑袖白領恤衫，話遲啲只要帶埋老婆去特賣場，自己就唔使用腦都可以有衫着喎。咁搞法，睇怕阿Ben着衫永遠都係「太太Style」。
卓妮