食肆霸街當食環署冇到
食肆阻街無視食環署檢控！「一到晚市就會將啲枱櫈放晒出嚟，當正條路係自己咁，塞住晒，仲整到成條街都污糟邋遢！」陳先生家住油麻地新填地街，附近不但食肆林立，晚上更變身「露天食堂」，噪音與衞生問題均令街坊飽受滋擾。陳先生曾多次向食環署投訴，惟情況一直未有改善。
四宗投訴兩宗檢控
食物環境衞生署發言人指出，接獲本報轉介後曾派員巡查，發現食肆於行人路擺放桌椅，已檢控食肆負責人。由今年一月至今，該署共接獲四宗相關投訴，並提出共兩宗檢控。根據《簡易程序治罪條例》，任何人士在公眾地方造成阻礙，即屬違法，最高可被判罰款五千元或監禁三個月。
「罰咁少，罰咗咪當交租囉，一晚生意都唔止啦！」陳先生坦言不滿食環署檢控無力，以致未能產生阻嚇作用，令居民依然每晚受到食肆滋擾，要求政府盡快檢討法例成效，以保障市民利益。
記者：何穎賢