津貼學校應唔應該轉做直資學校，最近成為議論紛紛嘅社會話題，支持者認為轉直資能夠改善教學質素，反對者覺得學校一旦轉直資，難免令人擔心學費變得貴到離晒大譜，剝削窮家子弟入讀名校嘅機會。你知啦，草根階層脫貧嘅不二法門就係十年寒窗苦讀，讀完小學讀中學，讀完中學讀大學，大學畢業先至有望搵到一份入息比較高嘅工作，否則隨時步上窮爸爸嘅後塵，即係跨代貧窮薪火相傳。
由於轉直資係一個咁惹火嘅議題，所以先後有兩間傳統名校碰得一鼻子灰。第一間係聖保祿中學，轉直資嘅申請被教育局否決。第二間係聖士提反女子中學，校方認為直資議題對學校造成嚴重分化，決定暫時擱置提出轉制申請。簡單咁講，傳統名校轉直資遇到大量反對聲音，理據係昂貴嘅學費造成太高嘅門檻，違反孔老夫子所提倡嘅有教無類原則。
既然最關鍵嘅核心問題係學費，各界人士係咪應該探討一下呢？聖保羅男女中學退休校長潘鎮球喺電台節目就話嘞，低下層學生愈來愈少入讀直資學校，社會貧富懸殊等等問題令人批判直資制度，所以佢話：「政府真係要睇睇學費是否太高。」
潘鎮球係傳統名校轉直資嘅先驅，曾經帶領聖保羅男女中學由津貼學校轉為直資學校，既然連佢都承認直資學校嘅學費係一個障礙，特區政府嘅教育官僚冇可能唔深切反省囉。即係咁，假如直資學校嘅學費設置上限，唔容許校方以種種藉口收取窮家子弟無法負擔嘅費用，反對聲音如無意外會大大紓緩。
正如潘鎮球話齋，直資學校校長及管理人有責任解釋點解要加咁多學費，而且學費一定要集中用於師生方面，唔應該用於次要嘅事情之上。
就以聖士提反女子中學為例吖，當年成立學校嘅初衷係幫助弱質女流擺脫「女子無才便是德」嘅封建魔咒，透過教育建立起女子能頂半邊天嘅自尊。假如轉直資扼殺女生嘅入讀機會，創校先賢睇怕嬲到靈位都會冒煙。
其實成件事嘅道理好簡單，轉直資唔係話唔得，不過先決條件係唔可以過分加學費。潘鎮球作為帶領學校轉直資嘅先驅，佢都覺得政府應該睇睇學費是否太高，證明呢一個道理實在係人心所向。
求學不是求分數，辦學不是求着數，學費若然太貴，好容易令人誤會教育工作者一個二個變晒牟利主義者o架咋！
不如咁啦，教育局局長吳克儉約潘鎮球以及一班為人師表嘅熱血人士飲茶傾偈，睇睇直資學校嘅學費應該點樣設限。