最近有網民呼籲每人集資一百元登報紙廣告，要求特首梁振英下台。有份參與嘅環保觸覺主席譚凱邦，就網上呼籲想參與嘅網民捐一百蚊去一個銀行戶口，點知有市民向本報投訴呢個戶口其實係譚凱邦嘅私人戶口，質疑佢「非法募捐」。
譚凱邦話，自己跟足法例去做，網上呼籲人捐款根本無犯法，估唔到社會真係咁撕裂，連籌款都被人質疑喎。
呢個一人一百蚊登廣告嘅行動被形容為「紅衫魚運動」，唔少立法會議員好似范國威都有份參與。我哋曾經嘗試過捐十元去有關戶口，睇吓係咪屬於譚凱邦嘅私人戶口，櫃員機就因為保安理由冇在收據上顯示戶口持有人嘅姓名。不過，譚凱邦就承認有關戶口屬於佢，因為今次純粹個人參與，同環保觸覺並無關係，所以先用個人戶口，唔想令人混淆。
我哋問過大律師陸偉雄，佢話由於現時無法例清晰列明咩叫非法募捐，所以網上公開籌集資金，就算用個人戶口都並無不妥。
雖然譚凱邦話收捐款後會一一列明捐款人同金額，但有幾多人咁神心捐完錢、之後仲要傳番張入數紙同姓名去畀佢哋呢？