政情：兩局盲搶沙田地
今屆政府銳意解決市民住屋問題，但因為土地短缺而要四出覓地，最近仲發生部門之間盲搶地情況。上屆政府曾計劃喺沙田石門興建骨灰龕，但唔知點解運輸及房屋局（運房局）轄下嘅房屋署早前主動通知沙田區議員，聲言會將有關土地興建公屋。不過，點知一星期後，食物及衞生局（食衞局）又推翻運房局決定，攞番笪地興建骨灰龕。今次兩政策局分別為生人同死人鬥搶地，反映兩局之間嚴重溝通不足。
港府發展啟德出過醜
「貪曾」前特首曾蔭權爵士在任時隨口噏當秘笈，亂噏要喺全港十八區各區興建骨灰龕場，仲擺晒啲區議會主席上枱，搞到怨聲載道。當時有幾區已擬定好建龕場嘅位置，其中沙田區嘅地點就係石門安興里。不過，自從政府換屆後，一直都冇人再提過呢笪地，當地區人士以為事情不了了之，上月突然就有新進展。據聞首先係房屋署官員搵相關沙田區議員重提呢個地點，但唔係建議起骨灰龕，而係建公屋。
呢班區議員不以為意，諗住建公屋梗係好啦，所以就一致贊同。點知事隔一星期，竟然有另一班來自食衞局嘅官員又搵佢哋接洽，話要用同一笪地建骨灰龕場，於是搞到班議員一頭霧水，批評政府內部溝通混亂，令人無所適從。其實港府傳出同其他政策局搶地事件，已經唔係第一次發生，好似之前曾有傳言話，港府要攞啟德體育城笪地嚟建屋，接着又傳出喺地區要插針咁建屋，就連籃球場咁細嘅地都唔放過，聽聞呢一切已引起地區好不滿。
食衞局終爭贏起龕場
有地區人士質疑，港府內部溝通混亂，無長遠規劃，為咗搵地建屋搞到方寸大亂，唔單止地區、連各政策局都無所適從。講番今次喺沙田石門嘅呢笪地，雖然食衞局最終搶番笪地，但期間發生嘅混亂過程，已成為區議員嘅笑柄，話唔知點解嗰度咁旺，搞到生人同死人都要爭地喎。