中環出更：遊蒙古探孤兒 梁煒茵無涼沖
蒙古綠草藍天，風光如畫，東華三院前總理梁煒茵（Iris）日前同二十多位教友探訪當地孤兒，初嘗入住蒙古包滋味，雖然無水沖涼四日，言語又不通，但蒙古小孩嘅純真笑臉，完全融化了香港人嘅心。
初次遊蒙古，地靈人傑，小孩尤其熱情，見有稀客到訪，主動上前幫手攞行李。Iris話，當地人只會講蒙古語，起初有點雞同鴨講，加上手語同身體語言溝通後，好快混熟。大夥兒齊玩呼拉圈、大草原上騎羊仔，晚上再圍圈開營火會，圍住火爐唱歌跳舞，一起品嘗駱駝奶，縱然沒有電腦、手機，仍然笑聲不絕。
與當地小孩碌草地
無水沖涼四日，Iris笑言「無所謂，臭就臭，由得佢」，佢同小孩玩得忘我時，碌喺草地上都唔介意。蒙古通訊唔方便，身處無WhatsApp、無得收email的日子，感覺好輕鬆。佢話難得靜下來細味生活，體會人與人之間，相處其實好單純，不必太多猜忌，反而更開心。
卓妮