政情:收料站:頻晤商界 卿姐想選特首?

最近商界盛傳民主黨主席劉慧卿動作頻頻,不時透過中間人相約有分量嘅商界人士會面、甚至飯局。話題當然離不開政改,有人透露卿姐言談間表明,泛民只會推舉一人參選特首,以免分散票源,講到好似自己有興趣出選咁。

據聞卿姐相約商界中人食飯,係幾個月前開始。由於卿姐商界人脈唔多,每次都靠「中間人」搭路。而卿姐同商界人士強調,泛民最怕二○一七有篩選,點知有人心水清反問卿姐,「咁你哋搞泛民預選,咪即係篩選?」該商界中人又立即打圓場話,預選同篩選唔同,就算泛民中人預選落敗,都可照舊參選特首。卿姐聽完之後即刻點晒頭話「咪係囉!咪係囉!」

聲稱只係交流意見

商界中人對卿姐「突然主動」約傾特首選舉,都感到少少奇怪。我哋問番卿姐所為何事,佢話自己唔熟商界人士,所以只靠立法會幾位商界議員幫手,約其他商界中人傾下偈。至於係咪放風想選特首,卿姐話無咁嘅事,只係交流下意見喎。到底卿姐同商界朋友嘅理解點解咁大差異,咁就真係要留意事態發展喇。

第一手消息請下載on.cc東方互動iPhone/iPad/Android/Windows Phone Apps