政情：中環出更：為愛兒升學探路 李文俊遊加國
安排子女到外國升學，係唔少港人家長嘅心願。卓妮日前喺一個青年活動上遇到百仁基金主席、理文造紙主席李文俊（Raymond），見佢曬到一身健康膚色，佢透露剛剛同家人去加拿大度假一周，同兩個讀緊小學嘅囝囝享受天倫樂，仲順道帶佢哋熟悉當地環境，打算未來安排佢哋去留學。
三子之父做榜樣 籲「莫生氣」
Raymond話，佢唔係對香港教育制度冇信心，只係佢本身都喺外國畢業，覺得留學可讓小孩接受多元化教育，擴闊國際視野。叉足電返港嘅Raymond，現正積極籌辦「百仁之友」計劃，將於九月喺各中學及大專院校試行，屆時會以各式各樣活動，鼓勵青少年實現夢想。Raymond坦言，自己二十年前剛畢業，亦一樣唔知目標係乜，但相信只要做好自己，就一定能實現夢想。
近日有老師講粗口引起社會紛爭，Raymond話自己當年年少氣盛亦難免會「爆粗」，但依家有三個囝囝，就要做好榜樣。佢透露，有時同老婆嗌交，佢會保持沉默離場，睇陣書冷靜吓，過一陣就會發現，其實都冇乜好嬲。佢笑言，生氣令自己遍體鱗傷，人哋就安然無恙，倒不如唔好嬲好過喇。