利東邨民居損裂 港鐵證免責受質疑
港鐵南港島線工程貫穿香港仔利東邨地底，繼早前本報報道鑽爆令利東邨居民「有得震冇得瞓」後，近日再有居民反映大廈石屎剝落、幼兒中心外牆乍現裂痕，直斥港鐵工程擾民。港鐵承認至今接獲二十六宗有關該邨懷疑大廈裂痕或損壞個案，僅一宗證實與工程有關，惟立法會議員與區議員俱質疑港鐵委託公證行處理或對小市民造成不公平，要求檢討有關機制。
利東邨居民陳先生日前發現，東茂樓地下幼兒中心外牆出現裂痕，並裝有一儀器，疑為量度裂痕，「個工程搞到條邨日日都震，估唔到震到牆都裂埋！好彩放緊暑假，如果有起事上嚟，幼稚園有咁多小朋友，有咩意外就大件事！」
居於東茂樓的林先生亦指單位廁所窗戶近日難以打開，窗邊瓷磚更告鬆脫，「住咗四年一直冇事，咁啱工程開始咗隻窗就爛。」林不滿公證行指無證據顯示損壞乃由工程引致。另一街坊林女士亦指東茂樓為重災區，「前幾日先有成塊石屎由天花跌落嚟，隔籬屋同後樓梯嘅天花都有甩石屎，真係一路住一路驚！」
時間脗合 質疑公證行獨立性
當區區議員區諾軒坦言曾接獲多宗包括單位出現裂痕、裂痕擴大等投訴，惟經公證行評估後，大部分結果均指損毀非因工程造成，「事件反映係制度問題，大家都好質疑公證行嘅獨立性，尤其係好多單位損毀嘅時間同工程好脗合。」區又指小巿民未必能負擔自行聘請公證行費用，「搵公證行嘅錢分分鐘夠維修間屋！」要求港鐵檢討機制。
港鐵發言人指出，今年三月接獲幼兒中心外牆出現裂痕通知後，已安排工程團隊及承建商代表實地視察及作專業評估，並於該處安裝裂痕監察儀。經保險公司聘請的公證行進行獨立評估後，結果顯示裂痕並非由鐵路工程引致。發言人又說，工程動工至今共收到二十六宗有關利東邨懷疑裂痕或損壞的個案，其中一宗證實與工程有關，港鐵已就此跟相關人士商討復修安排。另有六宗個案在處理中，其餘已完成調查作覆。
「港鐵大公司咁多資源，如果要搞到要上法庭嘅話，小巿民點同佢哋鬥？」立法會民政事務委員會發言人王國興認為，港鐵以息事寧人態度處理居民訴求較佳，「無論係唔係工程原因都好，港鐵都唔應該計較咁多，應該盡量幫巿民解決問題！」
記者朱廣華