功夫茶諗極都唔明，香港遍地庸官，一個招牌跌落嚟隨時砸中幾個，但係點解次次發生冧樹事故，受害嘅都係市民，而唔係庸官呢？如果港產官僚能夠被冧樹扑醒，起碼會認真啲做好驗樹護樹工作，咁就唔使連累無辜市民啦！
嗱，冧樹事故又重演嘞。話說日前颱風襲港後，五名男女自組義工團到荃灣光板田村清理廟宇，點知禍從天降，一棵蕉樹突然連根拔起倒塌，再壓倒旁邊一棵已枯死橡樹，兩樹如骨牌塌下，其中一名男義工走避不及，後腦遭樹幹重擊，當場頭破血流，倒地昏迷，送院搶救後命危。地政總署證實塌樹位置屬政府土地，估計該樹因樹幹基部枯萎引致倒塌；署方急急補鑊，隨即聯同樹木辦派人到場檢查枯樹及巡查附近一帶樹木。
唉，出咗事至驗樹，賊過至興兵，有鬼用咩！就算驗到其他樹無事又點啫，港產官僚敷衍了事，下次唔知又輪到邊個市民唔好彩。功夫茶想問問地政總署，上年大埔發生塌樹壓死人慘劇，署方不主動驗樹已經畀人狂插，事隔唔夠一年，轄下土地又發生塌樹傷人意外，究竟你哋幾時至肯吸取教訓呀？係咪要再搞出人命，你哋先至知驚呀？
呢嗱嗱嗱，禍不單行，荃灣同日亦發生險象環生嘅塌樹意外。路邊山坡一棵大樹又係連根拔起，壓中一輛私家車車頭，擋風玻璃爆裂，女司機閃避不及，手指被割傷，好彩無其他大礙咋，總算係不幸中之大幸。不過咯喎，冧樹危機防不勝防，下次仲有冇咁好彩就好難講嘞。
所以話，朽木不可雕。唔通港產官僚真係要畀塌樹兜頭兜腦扑醒先至識做嘢？事實擺在眼前，現時嘅驗樹機制求求其其，路邊樹木隨時淪為殺人兇器，港產官僚得過且過，關人個關，講句好聽啲叫玩忽職守，講句唔好聽簡直就係草菅人命！
話時話，管樹官僚漠視冧樹危機，罔顧市民安危，功夫茶一啲都唔覺得出奇。當今世道乖謬，無奇不有，安全套不安全，前廉政專員湯顯明不廉不正，消防處不務正業，相比之下，樹木辦護樹不力，又何足為奇呢？屈指一數，近年發生嘅冧樹殺人慘劇一單接一單，市民唔係無辜枉死，就係無辜受傷，但係從來無一個官員被懲處，從來無一個部門被問責，試問冧樹危機點可能根除吖？
都係嗰句啦，庸官當道，何止樹木辦淪為廢柴辦，成個港府都係廢柴一碌。除非將腐朽官僚連根拔起啦，如果唔係，唔好話路邊大樹繼續冧到噼嚦啪嘞，港府呢棵病樹遲早冧到一仆一碌嘅咋！