探射燈：黑市經營 品質冇保證
不法分子養病狗，寵物店慘成受害人！大多數無牌狗場漠視狗隻需要，除生活環境惡劣外，狗場更欠缺育犬知識，令幼犬營養不足，甚至容易患上各種疾病。有動物組織指，該類病狗在市場甚為普遍，不少寵物店都曾成為「受害人」，「誤打誤撞」購入病狗。
外表難判斷是否有病
「寵物店有時都幾無奈，唔小心買咗無牌狗場嘅狗，唔知情下再賣畀市民，啲狗好快就會有病痛。」亞洲善待動物組織發言人崔倩萍指，幼犬兩、三個月大甚至初生時因「未大定」，難以從外表準確地判斷幼犬是否純種，或有否遺傳疾病等，如有人存心出售品質差劣幼犬予寵物店，相信難以防範。
「我聽過有間寵物店唔小心入咗隻幾星期大嘅狗仔，並且好快就成功賣出去，但咁啱賣咗畀人第二日，隻狗就死咗，害到間寵物店又要道歉，又要賠錢。」崔稱，上述個案只是冰山一角，政府應正視問題，加強打擊無牌狗場，保障一眾愛狗人士及狗隻的權益。