「貪湯」前廉政專員湯顯明再被踢爆使納稅人嘅錢買酒，滿足其一己私欲！貪湯喺○六至○七年任職海關關長期間買咗近一千一百支酒，其中三分之一仲係佢至愛嘅烈酒添，而呢一千多支酒就足足花咗二十三萬元公帑。以貪湯一年買酒嘅數量計算，平均一日耗用三支酒，除非佢每日飲三支飲到嘔，否則誇張啲講，千幾支酒可以打造「酒池肉林」，用啲酒來沖涼都仲得。如今貪湯使公帑瘋狂買酒已證據確鑿，有關方面應該展開深入調查，查看有否濫用公帑，以及有否存在利益衝突。
