政情：建制撐堆填 辣攻環境局

促當局積極落區紓不滿

擴建將軍澳、屯門同打鼓嶺三個堆填區呢個政治炸彈一直纏擾政府多年，上屆政府擴建將軍澳堆填區法令被立法會「廢令」，及至去年爭取擴建三個堆填區同落實興建焚化爐時，分別遭到立法會多個黨派反對及長洲居民提出司法覆核而一拖再拖。及至現屆政府改由「新丁局長」黃錦星上陣亦重複犯錯，但今次係敗在先撤回將軍澳堆填區撥款後再硬推餘下兩個堆填區撥款，議員礙於居民壓力終要中止辯論煞停。

不過，新政府對擴建三個堆填區死心不息，「好打得」嘅政務司司長林鄭月娥全面介入統率擴建堆填區工作，早前更宣布最快於明年第一季再次向立法會提交堆填區撥款申請。有建制派中人話，環境局呢次根本無再失敗嘅本錢，為咗同建制派連成一線，一來要做好規定進入堆填區嘅垃圾車要密封等三項法律修訂工作，二來亦要積極落區疏導當區市民不滿情緒，等佢哋對當區區民有所交代。

唔想被睇死 或要博一鋪

此外，另有建制派中人話倘要有破釜沉舟嘅決心，黃錦星同陸恭蕙應同建制派「滴血為盟」，即同建制派政黨政團協定共同推動擴建堆填區，有功嘅話齊齊領，如果有鑊嘅話就要是但一人問責請辭承擔責任喎。話時話，電影對白都有講「非常時期用非常手段」，黃錦星同陸恭蕙敢唔敢賭呢一鋪，咁就要睇吓佢哋有冇咁嘅政治膽量喇，否則只會被建制派睇死，淪為冇膊頭冇腰骨嘅問責官員。