中環出更：許華傑訓斥電話騙徒：回頭是岸
「猜猜我是誰」呢類傳統電話騙案長呃長有，但就呃唔到中華出入口商會副會長許華傑（Michael）喇。卓妮之前講過Michael早幾日因為急性胃炎住院三日，點知小病初愈又接到「猜猜我是誰」電話騙徒，但佢就火氣十足，冇上當之餘仲以廣東話同普通話雙語幫人教仔，勸嗰位後生仔騙徒搵份正經嘢做好過。
醒目無中招 勸做正當事
話說Michael收到一個操普通話嘅人來電，聲稱換咗電話號碼，叫Michael估吓佢係邊個，Michael隨即揭穿對方嘅騙徒身份，仲額外加幾句「問候」說話隨即收線。不過，Michael收線後擔心對方聽唔明廣東話，於是打返轉頭用普通話鬧多鑊，仲愈鬧愈起勁，苦口婆心咁勸勉呢位後生仔騙徒要搵份正經嘢做，回頭是岸。
Michael收線後，都驚訝自己點解可以咁冇修養，話可能受近期社會氣氛影響喎，仲話有教師為咗心目中嘅「正義」而放肆講粗口鬧人，佢都係「聽教聽話」所以先咁做。不過，佢爆粗係對待不法騙徒，同之前教師爆粗鬧警員嘅例子相比，似乎唔係好啱咁喎。