中環出更：港乏展覽場地藝術家呻苦
唔少香港藝術家都呻過，話本港展覽場地極度不足，日前一個油畫展喺中央圖書館開幕，有藝術家就趁住致詞時向在場嘅藝術發展局主席王英偉（Wilfred）大吐苦水。Wilfred除咗聽意見外，仲與同場主禮嘅立法會議員林健鋒（Jeffrey）及中華廠商聯合會副會長李秀恒（Eddy）「唱三簧」，敦促政府盡快興建藝術場地。
李林先指排期耐撥款少
油畫研究會副會長李林先話，喺香港想搵個地方搞展覽都難，申請今次油畫展，排期等咗年幾至成事。早前西九龍文化中心舉行嘅雙年展，只獲藝發局撥款二十一萬元，與投放於威尼斯雙年展嘅資金相比，真係差天共地。Wilfred都認同話，香港要發展創意藝術同體育，硬件及軟件同樣重要，藝發局已經好努力咁幫藝術家搵場地，但都需要政府配合。
Wilfred坦言，香港作為國際大都會，體育文娛設施都落後於外國，真係要急起直追。至於Jeffrey同Eddy都夾晒嘴形，話希望政府起多啲展覽設施，並加大力度推行活化工廈，給予藝術家一個發展空間。Eddy本身有唔少工廈揸手，佢話因法例所限，工廈需要經過活化至可以合法成為畫廊，所以活化工廈有利推動文化創意，佢已經盡量以較便宜的租金租出旗下單位畀藝術人士。
對於撥款太少嘅申訴，身為藝發局支援委員會主席嘅立法會議員鍾樹根解釋，唔係佢哋唔想撥款畀藝術界，只係藝發局每年只獲一億多元撥款，但要顧及多達十個藝術範疇，根本唔夠使喎，真係巧婦難為無米之炊。
卓妮