特區政府嘅教育政策真係好鬼死得意o架，簡直得意過農曆七月鬼聲鬼氣鬼門關大開。即係咁，教育官僚一時話學生不足，所以起勢殺校，一時又話學生太多，所以供不應求。功夫茶想問一問「唔得掂」局長吳克儉，學生到底係不足定係太多呀？若然係太多，被殺嘅學校可唔可以起死回生呀？
學生太多嘅講法係咁樣嘅，由於跨境學童年年增加，入讀小一嘅學生人數持續上升，部分校網尤其係北區學額嚴重不足，所以年年都會掀起一場爭拗。為咗紓緩跨境學童帶來嘅壓力，教育局下年度打算增設跨境學童專用校網，將學生疏導至新界多個地區。跨境學童專用校網涵蓋八個校網，包括屯門西、屯門東、天水圍、元朗東、上水、粉嶺、沙頭角以及大埔，各小學每班最少撥出兩個小一學額；除此之外，東涌同馬鞍山兩個校網嘅學校可以自願參加，即係話可以收跨境學童咁解。
問題係，各小學撥出嘅學額足夠唔足夠呢？有冇跨境學童肯去東涌返學呢？以當中八個校網各校每班撥出兩個學額推算，新增嘅專用校網僅僅提供大約九百個小一學額，遠遠未能滿足預計有三千多名跨境學童升讀小一嘅需求。
大家唔好忽略一點喎，跨境學童增加嘅同時，本地學童亦有上升趨勢，學額若然撥咗畀跨境學童，變相減少本地學童嘅入讀機會。正如有元朗區小學校長批評，元朗學額早就供不應求，必須向天水圍借調四百個學額應急，家陣仲要調撥學額畀跨境學童，只會加劇本地同跨境學童嘅競爭。簡單咁講，小一學額爭崩頭！
所以話啫，富有香港特色嘅教育政策真係隨時玩死人，過往幾年教育局兇神惡煞強制部分學校執笠大吉，理由係收生不足，一個屈尾十又話現有學額無法應付需求，有必要增設跨境學童專用校網，要求學校攜手合作江湖救急，幾乎令人誤會係歡樂滿東華共襄善舉，好彩吳克儉冇粉墨登場跳上台唱歌募捐咋。
香港國際社會服務社做過訪問調查，跨境學童家長百分之六十六認為，港府制訂跨境學童政策必須考慮平等競爭及一視同仁；百分之六十六關注交通時間長影響健康同學業；百分之七十認為必須設立專責部門協助相關政策。該團體建議，港府可活化北區、元朗以及屯門區空置嘅校舍以應付需求。
校舍之所以空置，其實反映官老爺計錯數，如果當初唔係殺校，校舍就唔會丟空養蚊啦！
呢嗱嗱嗱，知錯能改，善莫大焉，不如趁鬼節想想辦法，被殺學校借屍還魂又好，喺深圳設學校畀跨境學童就讀又好，總好過七個蓋冚十個煲吖嘛！