政情：網民借抗日示威 抽佔中水
尋日係八一五日本戰敗紀念日，多個團體輪流去日本駐港總領事館示威。聲稱由網民發起、但有疑似愛港之聲成員參與嘅「歷史監察，網民自發」，尋日都有夥拍保釣行動委員會等民間團體去中環和平紀念碑獻花，不過佢哋花都未獻，就舉起「太平盛世，何必佔中？」標語牌宣傳反佔領中環訊息。
有疑似愛港之聲成員參與
見到咁嘅情況，保釣行動委員會嘅曾健成 （阿牛）即時無名火起，上前指罵對方係「走狗」、「賣國賊」，又揶揄叫對方「去打日本仔」。畀阿牛咁樣鬧法，「歷史監察」組織一眾示威者即時頭耷耷行開，等阿牛等人走咗之後先出返嚟接受記者訪問。
召集人李美娜否認自己同其他成員與愛港之聲有任何關係，而有份示威嘅疑似愛港之聲成員彭春娥就話自己一早已經退出咗愛港之聲，現時係以獨立身份參加「歷史監察」活動。被問到幾時退出同離開原因，彭春娥就三緘其口，淨係話覺得呢個係明智決定喎。