政情：分身不暇 慢必退出「人力」？
人民力量近半年可謂波折重重，先有黃毓民宣布退出人力執委，後有劉嘉鴻辭任主席，要由前港姐袁彌明補上主席一職，尋日仲突然傳出消息，話立法會議員陳志全（慢必）都要退出「人力」。莫非慢必眼見人力仲未可以重振昔日光輝，所以想倣效政助莫宜端，盡快跳船斬纜？
身兼7個事務委員會
我哋即時搵慢必求證謠言真偽，原來慢必要退出嘅並唔係人民力量，而係立法會轄下嘅人力事務委員會。慢必話，由於毓民已退出人力，立法會只有兩名議員，佢同陳偉業（大舊）要重新分配立法會分工，佢要加入以前由毓民做代表嘅教育事務委員會，而大舊就加入房屋事務委員會。
不過，由於慢必依家已經身兼七個事務委員會委員，成日都因為要開會而搞到分身不暇，所以惟有無奈退出人力事務委員會。佢仲話，由於人力喺保安事務委員會都無代表，復會後如果唔算太忙，佢會加入埋保安事務委員會喎。