政情：建制派撞板撞到驚

我哋聽聞，有位建制派大佬最近同人勁呻話，今次中央心目中嘅政改藍圖究竟係點，未到最後一刻都唔作得準，所以佢哋費事強出頭。因為近年佢哋已經歷咗兩次集體「撞板」慘痛教訓，唔想再失威。

揣摩唔到阿爺心意

乜嘢教訓咁慘痛？第一次咪係三年前政改「五部曲」嘅第三部曲囉！當時政府提出修改《二零一二年行政長官及立法會產生辦法建議方案》，民主派同中央展開拉鋸戰，當時建制派及中聯辦官員爭相出聲死撐中央底線，點知喺最後關頭，阿爺突然讓步，接受民主黨提出嘅區議會功能界別方案，增設區議會超級議席，令政改談判一夜間峰迴路轉，喺立法會夠三分之二通過。當時有份做打手嘅建制派跟不上形勢變化，當堂呆晒。

最陰功係有個別建制派中人，佢呢頭斬釘截鐵話，民主黨方案係「三無」，即「無法律依據、無先例可循和無必要」，點知轉頭就撞板。連被視為中央密使嘅基本法委員會副主任梁愛詩，都要跟住形勢打倒昨日的我，兜番話方案無違反人大決定，真係有苦自知。

特首選戰換將大亂

建制派第二次集體撞板，係由前年底一路打到去年初嘅特首選戰。選戰初段，中央明顯支持前政務司司長唐英年，某政界高人透露，當時建制派大佬都收到柯打，話要出席唐唐嘅造勢大會，仲話「一個也不能少」。嗰場政商娛樂界猛人齊集嘅造勢大會，墟冚場面令人難忘。不過佢哋斷估唔到，中央會毅然陣前換將。一眾接柯打挺身撐唐嘅建制派方寸大亂，被人問起究竟支持邊個，都唔知點樣自圓其說，冇晒威信。

呢兩次經歷都太慘痛，今次仲唔睇定啲至出聲？