中環出更：洪為民變「髮」 潮剪剷青Look
天氣熱，頭髮太厚都幾辛苦。互聯網專業協會會長洪為民（Witman）就趁炎夏來個「剷青Look」，將原來陸軍裝頭剷走一大「忽」，潮爆程度，與平時的平實造型大相逕庭，好友爭住問：「做乜咁激！」
出席活動成全場焦點
Witman日前現身一個晚宴，新髮型成為全場焦點，有人爭住拍照，有人爭住摸兩下。「剷青Look」咁潮爆，莫非髮型師失手？非也。個師傅已幫Witman剪髮廿年，日前突然提議佢不如試吓新嘢，Witman一口答應，話口未完，髮型師手起刀落將耳邊兩側頭髮剷光，嚇到Witman話：「會唔會似公雞o架？」幸好修剪完畢，型Look盡現，埋單找數，盛惠六百大元。聽聞呢個師傅有唔少明星、名人客，是非纏身嘅發展局局長陳茂波都係佢客仔。
講番Witman，佢月底將代表香港及中國，以評審身份前往愛沙尼亞，參加由多個國家聯手舉行嘅互聯網比賽。不過飛往當地飛機班次唔多，中途等轉機要成十幾粒鐘，諗起都驚喎。
卓妮