中環出更：帶隊遊雨林 謝偉銓大開眼界
每年都出動探險嘅立法會議員兼香港專業及資深行政人員協會會長謝偉銓（Tony），早前帶隊遊馬來西亞婆羅洲熱帶雨林，一行九人展開六日五夜探索之旅，同行仲有理事鍾志平、秘書長李惠光及四位早前勝出「卓育菁莪大比併」計劃嘅四名大學生等。
初次到訪雨林，Tony做足準備，帶定強力蚊怕水及防水衣物，佢哋分別參觀浪比爾國家公園及尼亞國家公園。入到雨林內，抬頭一看，巨樹參天，單係樹根已成個人咁高；動植物種類豐富，漫步森林內，隨處可見毛毛蟲、變色龍、如拇指般大嘅紅蟻、七彩菌類及蜈蚣等，大家都大開眼界，導遊叮囑團友千祈咪手多多亂摸，否則好易掂到有毒物種。
參觀蝙蝠洞 窺探獵頭族
Tony話，若要數最刺激行程，莫過於參觀聚集成千上萬隻燕子及蝙蝠嘅石洞，入到山洞內，伸手不見五指，忽然見到一排排倒吊的蝙蝠雙眼在放光，都咪話唔驚。咁多嘢睇，團友堅持每日行山四至五小時，帶定生果充飢，行畢全程後，團友個個渾身濕透，所以Tony例必帶定一套衫喺雨林出口更換。
大馬嘅雨林，百多年前曾有獵頭族「伊班族」出現。時至今日，族人已被安置喺高腳木屋的村落內，團友於是爭住去八卦睇吓，發覺「獵頭族」後人外表與一般馬拉人無異，佢哋唔再殺人獵頭，而係過住食飯炒菜的簡單生活。
卓妮