但凡有政府職位空缺想請人返工，官場一向嘅遊戲規則係公開招聘，例如將招聘廣告上載公務員事務局以及勞工處嘅網站。公開招聘嘅用意好簡單，就係避免黑箱作業私相授受，唔容許官老爺用人唯親。你知啦，私相授受往往帶來貪污腐敗，有人提供好處，有人獻上回報，咁就有損廉潔奉公嘅核心價值。
偏偏最近醜聞多多嘅消防處破壞遊戲規則，有職位空缺想請人返工嘅時候鬼鬼祟祟，居然冇公開招聘喎，只係透過消防處自己嘅網站刊出告示，街外人想睇到都難，明顯係要益自己友。
成件事係咁嘅，今年三月政務司司長林鄭月娥喺花園街四級火死因聆訊結束之後，下令消防處及屋宇署一年內完成巡查六千五百幢舊式商住樓宇，令到消防處嘅巡查工作大增。於是乎咯喎，消防處招聘十六個職位，申請者必須具備十年至二十五年滅火或執行消除火警危險法例嘅經驗，主要職責係巡查舊式樓宇嘅消防安全，月薪由二萬三千幾至六萬五千多元不等。待遇相當不俗o架，而且學歷要求甚低，助理消防區長及消防隊長嘅最低要求係中學會考或文憑試五科合格，消防隊目更加只要小六畢業就得。
招聘告示僅僅刊出於消防處網站，有違公平公開原則，所以資深紀律部隊人員就質疑嘞，咁嘅做法明顯係翻閹退休消防員，小圈子以外嘅閒雜人等一概免問。甚至乎有一個可能，招聘對象早就有特定人選，鬼鬼祟祟玩翻閹純粹係求求祈祈做一場戲。
所以話啫，現屆梁朝政府確係唔得掂，管治模式愈來愈不得人心。香港大學民意研究計劃公布最新民意調查，結果顯示特首梁振英嘅支持率淨值係負三十一個百分比，再次跌至任內新低，發展局局長陳茂波支持率更加跌至負四十五個百分比，同CY一樣屬於「表現失敗」。民研計劃總監鍾庭耀表示，梁振英管治班子情況令人憂慮。
係呀，真係令人憂慮，萬一消防處由於私相授受而再爆出貪腐醜聞，功夫茶可以好肯定咁話，梁朝政府捱得過五年任期嘅機會微乎其微。喂，貪曾同貪湯事件你都仲可以賴係前朝遺恨，若然消防處玩翻閹玩到烏煙瘴氣，呢一筆爛帳就要算到現屆政府頭上o架喇！
如果功夫茶係梁特首，第一要反躬自省，第二要管束下屬，唔好任由執政團隊嘅支持率跌到貼地，甚至嚴格而言係「跌穿地殼」。再講吖，若然一個唔好彩要撤換表現不濟嘅消防處處長，記住公開招聘喎，唔好黑箱作業喇！